John 18-21 in Ron (Butura Dialect)

Here is another sample of scripture translated into Ron. The following is a translation of the Gospel of John, Chapter 18-21 by Rev. Daniel Bitrus, a speaker of the Butura dialect of Ron. I have done some minor changes on his original text to make it more readable for speakers of other Ron varieties, e.g. I have written word final “r”, which is dropped and replaced by vowel length in the Butura dialect.

18

1 Takfai ma Yesu a wal si findeli, a lang la si fe mbi’ mmis, ta fis mbir ti Kidron, kil mama kasirik ndee ti mun ti, ta lang ti si fe mbi’i. 2 Nai Yahuza mma a cu folal nzis a sun kili, Yesu a mana twaafan ti a tei si fe mbi’ mmis. 3 Ta har gik ma naf ma ɓol ka naf ma gyokai disang ti Ɓwe Saramash ma fashash si Farisiya si pak la sis ti ɗaam ma ɓol, si no’ mwan a safut, si nggayam. 4 Yesu a suni shak ɗaam mma mi wis a madis, ta he a fo, ta niyise “wamai hu ma gyoki?” 5 Si matisai, “Yesu ma Nazaret.” Yesu ta niyis, “Inii mani.” Yahuza mma a cu folal nzis a masor ti akul ka sis. 6 Tima a matai , “Inii mani”, si tik a takfai, si mashu a ndik. 7 Yesu ta tikis a luli, “Hu ma gam wa?”, si nii, “Yesu ma Nazaret.” 8 Yesu ta matai, “I niyuhe, inii mai yis, mma yin mai hu ma gami, hu hon naf kyani si wis.” 9 Sani ɓa ta swyai findel mma ndiya a lak, ta niihe “A Da a tu ti naf mma a faren, i fot ɗanggat la kwa.” 10 Nai Biturus yis ka wal ma bakam mmis, ta re’ la, ta hayis mor ma Saf ma mgbang ma fashash hwam ti ra mu ca la. Sum ma mori ndee a mun ye Malkus. 11 Yesu ta niyis Biturus, “Ha tik ti wali la a fatal! Hani i wan a sho karau ti shum mma Dimin a faren kwaa?” 12 Nai gik ma naf ma ɓol ka mamgbang mmisi akul ka ma gyokai kil ma Yahuda si kai Yesu si no’. 13 Si tong wan tis ta Anas wash ma Kayafa, mma ndee a mun ye Saf ma mgbang ma fashash a si wili. 14 Kayafa mai ndee a lakis naf ma Yahuda, ta niihe, a wu mahyau mma naaf ɗanggat ta mot a ɓur ti ɗafal shak. 15 Biturus si mar mbi’ ɗiin si kul fai ti Yesu. Nai mar mbi’i ta yu akul ka Yesu a magi ma wur ti Saf ma mgbang ma fashash a ɓur ma ndee a sun mar mbi’ ma fulal sii. 16 Biturus ta soris a fo ma kuɗang taa rik. Mar mbi’ mma mgbang ma fashash a suni ta tik la, ta findelet mar ti fwar ɗiin a fo ma kuɗang, nai ta lang ti Biturus a ɗikil. 17 Mar ti fwar tindi a fo ma kuɗang ti lulis Biturus, ti nii: “Ha ma tu ti fe mbi’ ma naaf sii kwa a?” Ta matetai: “Mawa, i ma a tu nzis kwa.” 18 Kil yit a maɗiri, nai mwar ka naf ma gyok kil si shu mwan ti mangga’, si masirai mwani a masuwa sis a san yishash mmis. 19 Nai Saf ma Mgbang ma fashash ta lulis Yesu a fa fe mbi’ mmis si gof ti nzis. 20 Yesu ta matisai, ta nii: “I findyaal a makpas, i gwaaf ti a mare ti kabok Ɓwe ka disang kil mma naf ma Yahuda si twaaf. I mbaan lak ɗam a mawet kwa. 21 Mimai a mun mma ha yen a lul sii? Ha lulis naf mma si halai sen a findel, si sun ɗam mma i lak.” 22 Tima Yesu a lak andi, ma gyokai kil ɗiin a masor ti a nggas ta ju sis, ta niyis: “Tite ha findelis Saf ma mgbang ma fashash andi?” 23 Yesu ta matisai, ta nii: “Mma i lak ɗam ma fwash, ha lakis naf shak ɗamani. Mma ɗam mma i lak maawei ti, ha ndu sen ami?” 24 Nai Anas ta tuk sis a mano’, wan ta Kayafa Saf ma mgbang ma fashash. 25 Biturus yis ka’ a masor a halai mwan, si niyise: “Ha a tu ti fe mbi’ ma naaf sii kwaa?” Nai ta kai siyo, ta nii: “Mawa, i ma tu nzis kwa.” 26 Ɗiin ɗanggat ta tu ti mwar ma mgbang mma ndee Biturus a hayis hwam ta lulis, ta nii: “Ndiye i shita akul si yis a kasirik ti morok kwaa?” 27 Biturus ta tik a kai siyo, nai korong ta worop tutolat. 28 Naf ma Yahuda si zan Yesu ta wur ta Kayafa si yu ti a wur ta Saf ma shiril ma Rom, kil ka’ ta mbule’. Nafi si kwis malang ti a wuri, ndok si le’, si bolai ca ti Paska. 29 Nai Bilatus ta lang la a rik, ta lulis, ta nii: “Naaf saa a tuk mai ɓuri ti?” 30 Si matisai, si nii: “Nakwai ka gbaf nzis, mma ni yes tis kwa.” 31 Bilatus ta niyise: “Hu tek sis damu, hu totis ɓur ngga’ ma nggutash mmu!” Naf ma Yahuda si matisai, si nii: “Ni ndok mma ni tot ɓur ti hek ɗeng kwa.” 32 Kyani ɗiyami si swei ɗam mma Yesu ndee uu lakan a fa mot nzis. 33 Bilatus ta tik la a tu ti wur ti saramat, ta lulis Yesu: “Ha ye Saf ma Yahuda mai a?” 34 Yesu ta niyise: “Sii luli ma hayaa mai ahun kaɗeng mma si findela a fa yin hai?” 35 Bilatus ta matai, ta nii: “Haa shitai ɗak i ma ye ma Yahuda mai a? Naf mma mi akul ka Saramash ma fashash si far ha a ra a yen. Mimai ha masai?” 36 Yesu a matai, a nii: “Saramat nzin ti lai ti kwa. Nakwai ti lai tuni ti, mma kwai naf ma kul fai nzin si mbayat, si fwang sen, ka ndok naf ma Yahuda si kai sen. Saramat nzin ti lai ti kwa.” 37 Bilatus ta lulis: “Nai ha ma ye Saf mai ha?” Yesu ta matai, ta niyis: “Ha lak kiga’, ha nii i ma ye Saf. Ndee si kir sen a lai a ɓur ti ɗam ɗanggat mai, ɓi i lak maawei. Ɗafal ma fuk maawei shak si halai sen.” 38 Bilatus ta lulis: “Mimai ma ye maawei?” Taa tei Bilatus ta tik a malang la, ta niyis naf ma Yahuda he: “I ɗusis ti gbaf ɗiin kwa. 39 A ngga’ mma hu maasai riyan ma Paska, hu ma fuk, ɓi i wak Saf ma Yahuda ha?” 40 Si cwai a fo, si nii: “Mawa, yis kwa. Baraba mai, ni fuki!” Barabahi ndee a munis ye gbandang ma she mai.

19

1 Bilatus nai ta kir si cwak Yesu. 2 Naf ma ɓol si lat rawan ti magi, si kiris a hai, si kiris hugwin ti sharan njurum. 3 Si yes, si niyis, “Ko mma ta ywash, a Saf ma Yahuda!”, si kapaak sis. 4 Bilatus ta tik a malang la, ta niyis, “Hu shitai i ma lang tis la a yu, ɓa hu sun i ɗusis ti gbaf ɗiin kwa!” 5 Nai si lang ti Yesu la, yis ti ka rawan ti magihi, ka hugwin ti sharan njurumi. Bilatus ta niyise, “Hu shitai naafani man!” 6 Saramash ma fashash ka naf ma gyokai ɗisang si shitis, si cwai a fo, si ni, “Hon si nggwak sis a fa mer! Hon si nggwak sis a fa mer!” Bilatus a lang la, a niyise, “Hu zan sis ɗama mmu, hu nggwak a fa mer, yin i ɗusis ti gbaf kwa. 7 Naf ma Yahuda si matisai, “Ni mati nggut mma ti ni, kpak ti, ta mot, a ɓur mma a ni ma ye mar ma Ɓwe.” 8 Tima Bilatus a halai andi ta shisheris hyang. 9 Ta ti a malang ti Yesu a wur, ta lulis, “Ha yes taa lel?” Yesu ta munis gbak. 10 Bilatus ta lulis, ta ni, “Ha wen a findel kwaa? Ha ben i ma ti mgbangat mma i wak ha a ra, si mut ti nggwak ha a fa mer.” 11 Nai Yesu ta matisai, ta ni, “Ha ma ti mgbangat a fa yin mma Ɓwe mai a fara. Naaf ma cu fwalal nzin, yis mai, ma ti male’ wuan.” 12 Takfai ma Bilatus a halai Yesu a lak andi ta gam mater ti wak Yesu. Nai naf ma Yahuda si cwai a fo, si ni, “Mma ha wak naaf saa a ra ha ma ye mwis ma Kaisa mai kwa. Naaf mma a ni yis ma ye Saf a masiris Kaisa hai. 13 Nai Bilatus a halai andi, a kir si lang ti Yesu la, Bilatus a mun a kil ti mun ti ɓur mma si laal ye Mare. 14 Reeni ndee ti mun ye ti kunggo ma Paska ti, ta reeni Bilatus ta niyis naaf ma Yahudahi, “Hu shitai Saf mmu man!” 15 Si cwai a fo, si ni, “Ha hon, ha hon si nggwak a fa mer!” Bilatus ta lulis, “Hu ma fuk ɓi i nggwak Saf mmu a fa mer a? Saramash ma fashash si matisai, si ni, “Ni ma ti Saf kwa, Saf mma ni ma ti, Kaisa mai kek.” 16 Nai Bilatus ta ti’is Yesuhi, ɓa si nggwak a fa mer. 17 Si zan Yesu, si lang tis la a takfai ti ram, yis ti mer mma mi wan a nggwak sis a hai, ta yu a kil ma ashit ɗak kyas ma hai. 18 A tei ti si nggwak sis a fa mer hai. Si nggwak naf ɗiin fulal a fa miyar ɗes, ɗanggat a ra mu ca, ɗanggat a ra mu kutyal. Yesu yis a sahi. 19 Bilatus ta kir si worong laki ɗiin, ta no a fa meri. Laki ti nihe, “Yesu naaf ma Nazaret, Saf ma Yahuda.” 20 Naaf ma Yahuda hyang si mbi’ laki, a ɓur mma ndee si nggwak sis a shen ti ram ma mgbang ti. Laki tindi ti mun ti fo ma Yahuda, si fo ma Rom, si ma Grik. 21 Saramash ma fashash si niyis Bilatus, “Ka ha worong ‘Saf ma Yahuda’ kwa, ka worong, ha ni, naaf sani a ni yis mai ma ye Saf ma Yahuda”. 22 Bilatus a matai, a ni, “Tyas, ɗami worong, mawan a sheni kwa.” 23 Takfai tima naf ma ɓol si nggwak Yesu, si har hugwinash mmis, si kar ti ndik pu’, si har ɗanggat‑ɗanggat. Hugwin ɗanggat mu dikili ti kat. Hugwini si lat ka mator. 24 Si lak ti a ɓat a sis, si ni, “Ka ca wyaat la kwa, ca shu bet a hai, ca shitai naaf ma cu hugwini.” Findelal mma si lak shak ɓa findel ma Ɓwe ta swe ti. Findeli a ni, “Si kar ɗiyam ma yish mmin ɓat a sis, hugwin nzin si hwi bet a hai.” Ngga’ mma ndee naf ma ɓoli si masai nai. 25 A shen ti mer mma si nggwak Yesu matisi ti sor ti si tisiti ka Mariyamu nafu ti Kilofa, si Mariyamu Magadala. 26 Yesu nai a shitet matisi si mar mbi’ mmis mma a wu fuki a masor a nggas, a niyet matisi, “a naa, mar mmish mani!” 27 Ta niyis mar ma mbi’i, “naa nza mwan!” Taa riyan kii mar mbi’i ta kul set a wur a yis. 28 A takfai ti andi Yesu a sun ɗiyam shak si swe. Ɓa ta swyai findel ma Ɓwe a nii: “Nakat ti kai sen”. 29 Ɗyei ɗiin ndee ti mun ti ka ham ma mwesan kyalak, nai si jop soso ti a ham ma mwesani, si no’ a fa shi hai, si ti’is a fo. 30 Yesu ta nzaɓwet ham ma mwesani, ta ni: “Ti walan.” Nai ta gan hai, ta mot. 31 Ma ho’an ma Yahuda si yu ta Bilatus, si kabok ɓa ta fukis si taarai naf mma ndee si nggwak, si jak funashi la taa fa meri. Ndee si lul andi a ɓur mma reeni ndee ti mun ye ti sinzam kil ti, nai sis a fuk ɓa funash si mun ti a fa miyar a reen ti nafosat kwa. 32 Naf ma ɓol si yes, si taarai naf fulal mma ndee si nggwak akul ka Yesu sakwar la. 33 Nai si yu ta Yesu, si shitai, au motis, si taarai sakwar la kwa. 34 Ɗanggat taa tu ti naf ma ɓol ta ɓulai Yesu ti dwon a faɗe, wash si ham si worop a mashu. 35 Naaf ma laku findel sani a shitai, ɗam ma laki kyash ti, a sun ɗes ɗam mma a lak maawei ti, a laku ɓa hu far maawei ɗes. 36 Kyani si mun andi, ɓa findel ma Ɓwe ta swe, maa a ni he “kyas mmis ɗanggat ngga ta tar kwa.” 37 Findel ma Ɓwe ɗiin ɗes a nii: “Ngga si shit a fa mma si ɓulai”. 38 Takfai ti ki ɗiyami Yusufu Arimatiya ndee a mun ye mar mbi’ ma Yesu taa mawet, yis a shisher naaf ma Yahuda. Yusufuhi ta yu a wur ta Bilatus, ta kabok fun ti Yesu. 39 Nikodimu mma ndee au mbaan wan ta Yesu ta fulul ta yu ti ɗiyam ma a yiran ma ndwan fyang mma ndee naf ma Yahuda si shwaahai fun, si lal ye mir si alo. Mir si alo mma ndee a kuli si ɗut ɗak fo’ a kpo. 40 Yusufu si Nikodimu si zan fun ti Yesu, si nggi’ a hugwinash, si shwai ɗiyam ma ndwan fyangi hai, a ngga’ ma ɓuran ti naf ma Yahuda ndee ti muan. 41 Kasirik ɗiin yit a shen ti kil mma si nggwaki Yesu ti. A kasiriki ton ma hyahi mma si hai ye fwyash yis ti. Mma si mbaan kir fun ɗiin ti a fwyashi kwa. 42 Ka ndok reen ti sinzam kil ti walet, nai si kir Yesu ti a fwyash ma toni.

20

1 Ren ti ɗanggat takfai ti nafosat ti naf ma Yahuda, Mariyamu Magadala ti yu a fwyash ta mbule’ kil ka’ witwit, ti shitai si tukan hayi la taa fo ma fwyash. 2 Nai ti tok mawan ta Biturus ka mar mbi’ sii, mma Yesu a wu fuki. Ti niyise, “Si zanan Saf Yesu la taa fwyashi. Ni sun kil mma si tik sis ti kwa.” 3 Biturus si sii mar mbi’ si lang taa wur mawan a fwyashi. 4 Si tok mafulal nzisi, sii mar mbi’i ta tokai Biturus a hai, ta tong ti a fwyash. 5 Ta magu’ ta shitai a fwyash, nai ta shitai hugwinash a nya a ndik, ta lang ti kwa. 6 Biturus ta yes a takfai, ta ɗusis ti, nai ta worop a malang ti a fwyash. Biturus ta shitai hugwinashi a nya ti a ndik. 7 Mar hugwin mma si no’is Yesu a hai yis a manggi’ damis gang ɗanggat, hugwinash ma shambaran mma ndee si ɓur sis ti, sis a manggi’ damis gang ɗanggat. 8 Nai mar mbi’ sii mma a tong ti a fwyash ta lang ti ɗes, ta shitai hugwinashi, nai ta far maawei. 9 A nani ti, si sun findel ma Ɓwe mma a nii, “Kpak ti, Ɓwe mawan a cinjo sis la taa mamot” kiga’ ti. 10 Fe mbi’i si tikis la a wur. 11 Mariyamu ti soret a fo ma fwyash, ti magu’, ti nggwel ti, yit a hwash. 12 Nai kek ti shitis ujilimash naf mma Ɓwe a ru’at taa fasa, sis ka hugwinash ma shambaran a mamun a kil mma fun ti Yesu ndee ti mun ti, ɗanggat taa kil ma hai, ɗanggat taa kil ma sakwar. 13 Si lulet, si niyet: “A nafu, mimai shi hwai?” Ti niyise: “Si zan Saf mmin Yesu, nai i sun kil mma si kir sis ti kwa!” 14 Takfai mma ti lak andi, ti masir, ti shitis Yesu a masor, ti sun, ti nii, yis mai kwa. 15 Yesu ta lulet, a niyete: “A nafu, mimai shi ma hwai? Shi ma gyok wamai?” Ti nii, ahun naaf ma kasirik mai, nai ti niyise: “A da, mma ha mai, ha zan sis la, ha laken kil mma ha kir sis ti, ɓi i yu, i tek.” 16 Yesu ta lal set, ta nii: “Mariyamu.” Ti masir, ti niyis ti fo ma Yahuda: “Rabbuni!” (ma gof ti ma mgbangmgbang). 17 Yesu ta niyete: “Ka shi kai sen kwa, ma ka’ ka adu ta Dimin, shi yu ta nyaas mmin, shi lakis, shi niyise, i ɗwen ta Dimin si Damu, Ɓwe mmin si Ɓwe mu ɗes.” 18 Mariyamu ti yu, ti lakis fe mbi’ ma Yesu, ti nii, ti shitis Saf Yesu, a kun a laket ɗaam kyai. 19 Ndee ren ma ɗanggat ta nunung takfai ti nafosat ti naf ma Yahuda, fe mbi’ ma Yesu si ndash fenash ma sam hai, sis a shisher ma ho’an ma Yahuda. Yesu nai ta yes, ta sor a sa nzis. Ta niyise: “Hu mun cala!” 20 Takfai ti findel sii Yesu ta gofis re ka faɗe mmis. Fe mbi’ si jakak kil mma si shitis Saf Yesu. 21 Yesu nai ta tikis a laki ma fulal, ta nii: “Hu mun cala! A ngga’ mma Dimin a rut sen, yin ma rut hu ɗes.” 22 Ta lak andi, ta fu’is nafos hai, ta nii: “Hu mat Mashilim ti Ɓwe. 23 Mma hu shwis naf male’ mmis la, Ɓwe ta shwis la. Mma hu kai male’ mmis, Ɓwe ta shwis la kwa.” 24 Mayes ti Yesu tindi, Toom mma si laal yo njan, ɗanggat a tu ti fe mbi’ mmis hure malang ful kii, yis ti kwa. 25 Toom ta tik la, nai fe ma mbi’ mma si kat a mamun ti, si niyis: “Ni shitis Saf Yesu”. Toom nai ta matai, ta nii: “Mma i shitai rifyal mma si nggwak sis a re, i nggyai rifyali ti fu ti ra nzin, i kir ra mmin a faɗe a yis kwa, tyas i wan a far maawei kwa”. 26 Takfai ti makon mafwara’ fe mbi’ akul ka Toom si ndash fenash ma sam hai. Shak ti andi Yesu nai ta yes, ta sor a sa nzis. Ta niyise: “Hu mun cala!” 27 Yesu ta niyis Toom: “Ha kir fu ti ra nza a nani, ha shitai re mmin. Ha yes ti ra mma, ha nggyai faɗe mmin, ka ha mun ti fo ful kwa. Ha fa maawei a yen!” 28 Toom ta matisai, ta nii: “Saf Yesu mmin si Ɓwe mmin”. 29 Yesu ta niyise: “Ha far maawei a kil mma ha shiten ha? Ɓwe ta kir masare a fa naf mma si far mawei ka si shiten.” 30 Yesu ndee a masai ɗaam ma mayor hyang a diyar ta fe mbi’ mmis mma si worong a kambyal kyani kwa. 31 Si worong kyani, ɓa hu far maawei mani, Yesu ma yo Kristi mai, Mar Ɓwe, mma hu kir ko a yis, ngga hu ɗusai mapwet.

21

1 Takfai ti makonash vaat, Yesu ta tik a gof hai nzis ta fe mbi’ mmis a polok ti mgbangmgbang ti Tibariya. Ngga’ mma ndee a gofis hai nzis maan. 2 Biturus si Toom mma si laal yo njan akul ka Nataniyel ta ram ma Kana a shinggil ti Galili, ka fe ma Zebedi si fe mbi’ ɗiin ful sis shak a madangat. 3 Biturus ta niyis gip ma fe mbi’i: “I mawan a gushe.” Si matisai, si nii: “caa wan akul!” Nai si lang a wur, si yu, si rang kwang ma ham. Fululi si kai ɗama kwa. 4 Ɓwe yit a maɗu, Yesu ta sor a fa njir ti fo ma poloki. Fe mbi’i si sun, si ni, Yesu mai kwa. 5 Ta lulis, ta nii: “A kambet, hu kai gushe ɗiin kutyo?” Si matai, si niyis: “Wa’, ni kai ɗama kwa.” 6 Ta niyise: “Hu hwi ti ɓolong taa gang mu ca ma kwangi, hu wan a ɗusai ɗiin gushei.” Si hwi ti ɓolongi, nai si mba gbyami la taa ham wet, kil mma si kaai gushe hyang. 7 Mar mbi’ mma Yesu ndee a fuk ta niyise Biturus: “Saf Yesu mai!” Biturus nai ta halai andi, ta no’ hugwin nzis, mma ndee awu sapaan yish, ta yu a wunat. Ta fis a poloki. 8 Gip ma fe mbi’i si yu a fo ma njo a kwangi, sis a gbyam ɓolong yo ma swyan ti gushe. Ndee si liɓit taa fo ma ɗer kwa, taa ham liɓitat ti kili mba sakur hure ndik hure yuhun. 9 Tima si ɗu la a fa tu, si shitai mwan ti mangga’ ti ka gushe ɗanggat a hai ka folok a shen. 10 Yesu ta niyis: “Hu kul gushe ɗiin mma hu kaai mamwash!” 11 Biturus nai ta yu, ta gbyam ɓolongi malang ti la a tu. Si ɗusai gushe ma ho’an hure ndik hure ti hure hara ti yuhun. Shak ti mun hyang ti gushei andi, ɓolongi ti wet kwa. 12 Yesu ta lal sis, ta niyis: “Hu yes, hu kir weng!” Ɗeng a tu ti fe mbi’i ta mba yis lul mani, ma yo wamai kwa, kil mma ndee si sun Yesu mai. 13 Yesu ta he a shen ti mwani, ta zan folok, ta faris, ta zan gushe ɗes, ta faris. 14 Gwaafan ti yuhun ndai ta fe mbi’ mmis takfai mma Ɓwe a shunjo Yesu la a mot. 15 Takfai ti cwai ca, Yesu ta lal Biturus, ta niyis: “Siman mar ma Jon, ha wu fuk sen si ngga’ ma fe mbi’ kyani si fuk sen‑a?” Biturus ta matai, ta nii: “A Saf, ha sun i fuk ha.” Yesu ta niyise: “Ha dak ti naf mmin.” 16 Yesu ta tik a lal sis a ma ful, ta nii: “Siman mar ma Jon, ha ma fuk sen‑a?” Bitur us ta niyis: “A Saf Yesu, ha sun i fuk ha.” Yesu ta niyise: “Ha dak ti naf mmin.” 17 Si ywash vaat, ta tikis a luli a ma yuhun: “Siman mar ma Jon, ha ma fuk sen‑a?” A nani ti kong, Biturus ko nzis ti magas a ɓur mma Yesu a lulis kasik yuhun, a niyis: “Ha fuk sen‑a?” Nai Biturus ta nii: “A Saf Yesu, ha sun ɗaam shak, ha sun i fuk ha!” Nai Yesu ta nii: “Ha dak ti naf mmin! 18 I laka mawei, ha ka’ a vat ndee ha nwaa’ arho ɗama, ha yu a kil mma ko ma fuk. Ngga ha yes, ha hwer ha tas re, ɗeng mai, ta no’a arho a nggong, ta kai ha a ra, ta yu ti a kil mma ka fuk.” 19 Yesu ndee a lak hani, ɓa Biturus ta sun masut ma ngga ta mot ti yes, ti faris Ɓwe mgbangat. 20 Nai si rang mawan, Biturus ta masir, ta shitis mar mbi’ sii mma Yesu a fuk, mma ndee a munis shen, sis a cwai ca ti walai si kon si kai sis, mma ndee a lulis ɗes, ta nii: “A Saf Yesu, wamai ma wan a cwai fwalal nza?” 21 Biturus ta niyis: “A Saf Yesu, sani he?” 22 Nai Yesu ta niyise: “Mimai ma ti? Mma i fuk ɓa ko mmis ta ywash, i tik a mayes, i ɗusis ti ko mai maati? Ha kul fai nzin!” 23 Nai findel ta worop mat ram. Naf ma kul fai ti Yesu si lang a niyai mar mbi’ sii ngga ta mot kwa. Yesu ndee a lak andi ti kwa. Ndee a nii: “Mma i fuk, ɓa ko mmis ta ywash, i tik a mayes, i ɗusis ti ko mai maati? ” 24 Sii mar mbi’ mai, ndee a shitai ɗaam kyani, yis mai ɗes a worong. Ca sun ɗam mma a lak mawei ti. 25 Yesu ndee a masai ɗaam hyang ɗes. Nakwai si worong shak ɗam mma Yesu ndee a masai, mma lai tuu ti ndok shu kambyali kwa.

Leave a comment

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s