Be happy with what you have got

Here is another story written by Amos Emmanuel Mabur, a young man from Daffo. It is what I call a “moral story”, warning young people to be satisfied with what they have got in life and not strive for more, following bad friends. Sorry, no English translation. Maybe you will find someone who can translate it for you.

 Shu re a hai ti ɗam mma aa ti

Ndee naaf ɗiin a mun na yo Malo, si mun a nggasas si shir ɓiil ful. Shiri ndee si lang la ta fulul, si yu a sherat. Mma si mun a wan a katulat nzis, mma si ndok a lan, si mashu a ndik, si mandikit, si tikis la yo murumash. Mma si wal a mun yo murumash, ka si yu, si shir ɗaam ma naf fat ka aa. Mma si mun a tik la a wur, ka si tik a shu a ndik, si mandikit, si tik la yo naf. Ka si kul lo ma ɗaam mama si hyeki a wur a nan ta naf mmis. Naf mmis a wur si cu, si hwaa’, si wu naf mama mi ti akul.

Nafu ti Malo ti shitai andai, ko mmit ta yangga’, ta sharis ti a tu, ti nii, itii mu wan a hon ra mmit mma ma wan yet a kwaalan lo tiryan fat naf mma mi akul kwa. Malo ta halai andai, ta nii, itii ma wan, ta ɗusis shir kyai ful a fa njakali. Ta niyis, ahun mi wan a hon sis, ta kwaal fai nzis. Si fukis, si niyis, ɓa ta ɗusis pwok ma fulul, ɓa kwa si yu akul. Ta yu, ta ɗusis a ngga’ mma si lak tihi. Si rang sis mawan a lan mama ka si masir yo murumash.

Ɗak si ndok ti, ɗanggat taa tu ta shiri ta fur a ndik, ta mandikit, ta masiris la yo murum. Ma fuli ɗes ta masai andai. Malo ta nii, ma masai ɗes, ta mbai nggongi wet. Shisher ti lang a kai sis, ta nii, ɓa ta mwaatis. Shiri si shitai andai, shum ti kai sis, si tik a sir yo ɗafal. Ɗanggat mmis ta yu, ta ɓil ham taa mar ti mbir ɗiin ta ti a nggasi, ta yes ti, ta shwai Malo hai, ta ku ta shit la.

Ɗak ti dwaaki a hai, shiri si niyis, mi wan a kir sis a tu ti ton ɗiin, ɓa sinii si yu a sherati. Ka si tik la, si kwa si ɗusis ti a toni. Si wun sis, si niyis, ka ɗama ɗiin a kir sis, ta nii, ma wan a lang la ta ti a ton kwa. Si niyis, mma a lang la, ma mandwish ti ti hai nzis ti. Si niyis, ma yes ta halai wareng ti furai nggwaaran sis, ɓa ta sun mi mater ma tik la ndai.

Malo ta kul fai ti ɗam mma si lakis, ta kat ti a ton gyor, yish yis a ro ɓak-ɓak. Mma cen a nin fa rwai sok ɗiin, ta gu’ ra fo fat rukun a fai shisher yish. Ɗak a yor ti a ton, a yes a halai wareng, ti furai gwaaran sis, fat kwai si lakisi. A ywash vaatun, sin myaan ti ti aa mama si yu si shyaar taa Mangguna, si lyaaf. Si lulis, si niyis, mimai a ɓulis hai ti a ton ɗak si wisi. Malo ta mbai findel wet a fa shisher tima ti kai sis. Shiri si mashu a ndik, si mandikit, si tik a tik la yo ɗafal. Si har lohi, si shu a ndik, si kar ti giga’ ka Malo, si kai mater mawis a wur.

Nafu ti Malo ti lang la, ti mat sis ti dor, ti nii: “Amwash ti, aa yo naaf ma ra mmin ma ko!” Malo ta tik a mbi’ ɗam ma kon a shitai a lan, sin akul si shir kyai ful, ko ta manis, ta jikis la a kima, ta tek lohi, ta ragot set ti, ta taɗaset hai, ta niyet: “Shaa yen a mun mbaa hai ahun wet? Mutikatul! Shaa fuk, ɓa i mot ahun shi far sen a fa lo ahun weti? Shi sun mater tima i sa kwa i ɗusai lo sani ha?” Ta shiɗet, ta nii, itii ma wan a shu re a hai ti ɗam mma ma ti, ta niyet nafu nzis, mma ti fuk kwa, si makar ti a fa ndiki.

Taa tei nafu ti Malo ndee ti tyaak yis a fu’ mwan a nggong a fa lo ahun ɗama ɗiin mma mi ti kwa. Malo ɗes, ndee a tik a lang la akul si shir kyai kwa. Ami? A fa awu mawunan ta mater ti shum.

Advertisements

Leave a comment

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s